२०७९ श्रावण २७ शुक्रबार
  • काठमाडौँ

खाना पकाउने ग्यासको मूल्य प्रतिसिलिन्डर २४ सय रुपैयाँ !

काठमाडौं – खाना पकाउने ग्यासको मूल्यबारे अध्ययन गर्न गठित उपसमितिले व्यवसायिक प्रयोजनका लागि परल मूल्यमै बिक्री गर्न आयल निगमलाई सिफारिस गरेको छ । गुणस्तर तथा नापतौल विभागका महानिर्देशक दिनानाथ मिश्रको संयोजकत्वमा गठित उपसमितिले यस्तो सिफारिस गरेको हो ।

घरायसी उपभोक्ताका लागि हालकै मूल्य र व्यवसायिक खपतका लागि परल मूल्यमै ग्यास बिक्री गर्न सिफारिस गरेको आयल निगमका कार्यकारी निर्देशक उमेशप्रसाद थानीले जानकारी दिए ।उपसमितिले बुधबार निगमलाई प्रतिवेदन बुझाएको र उक्त प्रतिवेदनले ग्यासमा तत्कालीन र दीर्घकालीन गरेर दुई थरी सुझाव पेश गरेको थानीले बताए ।

उपसमितिको सुझावले पहिलो व्यावसायिक प्रयोजनका लागि परल र घरायसी उपभोक्ता प्रयोजनका लागि हालकै मूल्यमा ग्याँस बेच्न सिफारिस गरेको उनले बताए ।उनले भने, ‘हामी व्यावसायिक प्रयोजनका लागि परलमा पनि केही नाफा खाएर ग्यास बेच्ने योजनामा छौं ।’ हाल निगमलाई एक सिलिन्डर ग्यासमा २ हजार २७१ रुपैयाँ लागत परेको र त्यसमा केही नाफा खाएर बेच्दा मूल्य बढ्न सक्ने कार्यकारी निर्देशक थानीले बताए ।

बोर्ड बैठकमा छलफल हुन बाँकी रहेको प्रतिवेदनले सिफारिस गरेअनुसार नै मूल्य निर्धारण भए होटल, रेष्टुराँ, क्याटरिङ लगायतका प्रयोजनमा खपत हुने प्रतिसिलिन्डर ग्यासको मूल्य २ हजार ४ सय रुपैयाँ हाराहारी पुग्ने निगमको अनुमान छ । तर, यसबारे व्यवसायीहरुसँग छलफल गर्न बाँकी रहेको उनले बताए ।

तत्कालका लागि उपभोक्तालाई हालकै मूल्य र व्यवसायीक प्रयोजनका लागि लागतमै ग्याँस बिक्री गर्न सिफारिस गरेको ग्याँसबारे अध्ययन उपसमितिका सदस्य एवं आयल निगमको खान पकाउने ग्यास तथा हवाइ इन्धन विभाग प्रमुख नेत्रप्रसाद काफ्लेले बताए ।

प्रतिवेदनले औद्योगिक प्रयोजनका लागि निश्चित उद्योग तोक्ने वा सबै उद्योगलाई कुल उत्पादनको १५ प्रतिशत उत्पादन व्यावसायिक प्रयोजनका लागि अनिवार्य गर्न पनि सुझाइएको छ ।

यस्तै प्रतिवेदनले व्यावसायिक प्रयोजनको सिलिन्डर आवश्यकता र मापदण्डका आधारमा ठूलो बनाउन सकिने पनि सुझाएको छ । उपसमितिले फरक(फरक प्रयोजनका लागि ग्याँसको सिलिन्डरको रङ्ग फरक बनाउन सकिने पनि सुझाएको छ ।

२०७९ असार २८, मंगलवार प्रकाशित 0 Minutes 647 Views

यहाँ प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुकट्विटरमा पनि जोडिन सक्नुहुन्छ ।

यो खबर पढेर तपाईलाई कस्तो महसुस भयो ?

ताजा समाचार