९ देशका खेलाडीलाइ पछी पार्दै किरण चेम्जोङ बने एसियाकै उत्कृष्ट फुटबलर

खेलकुद

काठमाडौं: नेपाली राष्ट्रिय फुटबल टिमका कप्तान तथा गोलकिपर किरण चेम्जोङ ‘एएफसी इन्टरनेसनल प्लेयर अफ द विक’ बनेका छन्।गत बिहिबार एएफसीले किरणसहित एसियाका शीर्ष १० खेलाडीको सूची सार्वजनिक गर्दै भोटिङका लागि आह्वान गरेको थियो।

अप्रिल ४ सम्मका लागि भोटिङ गर्ने समय तोकिएकोमा किरणले सर्वाधिक भोट पाएका छन्।

किरणले सर्वाधिक ५५.६९ प्रतिशत भोट पाए। दोस्रो स्थानमा साउदी अरेबियाका सालेह अल सेहरी रहे। उनले २०.७२ प्रतिशत भोट प्राप्त गरे। तेस्रो स्थानमा रहेका इराकका अला अली मवाईले १०.१६ प्रतिशत भोट पाए।

सूचीमा किरण, सालेह र अलासहित यूएईका अली माबखोत, कतारका मोहम्मद मुन्तरी, जापानका युया ओसाका, इरानका सरदार अजमोन, बहराइनका मोहमद मरहुन, जोर्डनका मुसा अल तामरी र ताजिकिस्तानका नका अलिसेर जालिलोभ परेका थिए।

एएफसीले गत साता अन्तर्राष्ट्रिय फुटबलमा गरेको प्रदर्शनको आधारमा १० खेलाडीको मनोनयन सार्वजनिक गरेको थियो। जसको विजेता वेबसाइटमार्फत आउने भोटको आधारमा तय गरिने एएफसीको भनाइ थियो।

साताको उत्कृष्ट खेलाडीको सूचीमा परेर विजेता हुने किरण पहिलो नेपाली हुन्।

किरणको कप्तानीमा नेपालले पहिलो उपाधि जित्ने क्रममा गत साता थ्री नेसन्स कपको उपाधि जितेको थियो। दशरथ रंगशालामा भएको फाइनलमा नेपालले बंगलादेशलाई २-१ गोलले पराजित गरेको थियो।

नेपाललाई उपाधि दिलाएको दुई दिनअघि किरण भारतको आई लिग सिजन २०२१ को उत्कृष्ट गोलकिपर चुनिएका थिए। उनी पञ्जाव एफसीमा आबद्ध थिए। सिजनको १५ खेल मध्ये १४ खेल खेलेका किरणले ७ खेलमा क्लिनसिट राखेका थिए। जुन सिजनकै सर्वाधिक क्लिनसिट हो। सिजनमा उनले तीन पटक प्लेयर अफ दि म्याचको पुरस्कार प्राप्त गरेका थिए।

किरण विदेशी लिगमा उत्कृष्ट भएको यो पहिलो पटक भने होइन। यसअघि सन् २०१८ मा किरण माल्दिभ्सको लिगमा उत्कृष्ट गोलकिपर घोषित भएका थिए।

किरणले सो सिजनमा टिसी स्पोर्ट्सलाई माल्दिभ्सको लिगको उपाधि जिताउन उत्कृष्ट प्रदर्शन गरेका थिए। उनी माल्दिभ्सको लिग जित्ने पहिलो नेपाली खेलाडी पनि हुन्।

‘एएफसी इन्टरनेसनल प्लेयर अफ द विक’ अन्तिम नतिजा

Leave a Reply

Your email address will not be published. Required fields are marked *